وزیراعظم شہباز شریف کا سعودی عرب، قطر اور ترکیہ کےاہم دورہ پر روانگی

 وزیراعظم محمد شہباز شریف تین دوست ممالک سعودی عرب، قطر اور ترکیہ کے چار روزہ سرکاری دورے کے پہلے مرحلے میں سعودی عرب روانہ ہو گئے ہیں۔ یہ دورہ 15 اپریل سے 18 اپریل 2026 تک جاری رہے گا، جس کا مقصد برادر ممالک کے ساتھ تعلقات کو مزید مضبوط بنانا اور اہم عالمی فورمز پر پاکستان کی نمائندگی کرنا ہے۔

وزیراعظم کے ہمراہ ایک اعلیٰ سطح کا وفد بھی موجود ہے جس میں نائب وزیراعظم اور وزیر خارجہ سینیٹر اسحاق ڈار، وزیر اطلاعات و نشریات عطا اللہ تارڑ اور وزیراعظم کے معاون خصوصی سید طارق فاطمی شامل ہیں۔ یہ وفد مختلف مراحل میں وزیراعظم کے ساتھ ملاقاتوں اور اجلاسوں میں شریک رہے گا۔

وزیراعظم کا دورہ سعودی عرب، قطر اور ترکیہ (15-18 اپریل 2026)

وزیرِ اعظم محمد شہباز شریف اپنے سرکاری دورہءِ سعودی عرب کیلئے روانہ

وزیر اعظم کے ہمراہ نائب وزیر اعظم و وزیر خارجہ سینیٹر محمد اسحاق ڈار، وزیر اطلاعات و نشریات عطا اللہ تارڑ، وزیر اعظم کے معاون خصوصی سید طارق فاطمی… pic.twitter.com/u6dD3nzi7K

— Government of Pakistan (@GovtofPakistan) April 15, 2026

اپنے اس دورے کے دوران وزیراعظم شہباز شریف سعودی عرب اور قطر کی اعلیٰ قیادت سے تفصیلی ملاقاتیں کریں گے۔ ان ملاقاتوں کا محور دوطرفہ تعلقات میں بہتری، معاشی تعاون کا فروغ، سرمایہ کاری اور علاقائی امن و سلامتی کے معاملات ہوں گے۔ پاکستان ان ممالک کے ساتھ پہلے ہی مختلف شعبوں میں تعاون بڑھانے کے لیے پرعزم ہے اور یہ دورہ اس سلسلے کی اہم کڑی ثابت ہوگا۔

دورے کے آخری مرحلے میں وزیراعظم ترکیہ پہنچیں گے جہاں وہ عالمی سطح پر معروف 'انطالیہ ڈپلومیسی فورم' میں شرکت کریں گے۔ اس فورم کے موقع پر وہ دنیا کے دیگر رہنماؤں سے ملاقاتیں کریں گے اور بین الاقوامی مسائل پر پاکستان کا نکتہ نظر پیش کریں گے۔ توقع کی جا رہی ہے کہ یہ دورہ پاکستان کے لیے سفارتی اور معاشی محاذ پر مثبت نتائج لائے گا۔