سعودی عرب کی جانب سے 3 ارب ڈالر کی اضافی معاونت کا اعلان، 5 ارب ڈالر ڈپازٹ کی مدت میں توسیع: وزیر خزانہ

وفاقی وزیر خزانہ و محصولات سینیٹر محمد اورنگزیب نے کہا ہے  کہ سعودی عرب نے 3 ارب امریکی ڈالر کی اضافی ڈپازٹ سپورٹ فراہم کرنے کا وعدہ کیا ہے، جس کی ادائیگی آئندہ ہفتے متوقع ہے۔ انہوں نے مزید بتایا کہ سعودی عرب کی جانب سے پہلے سے موجود 5 ارب ڈالر کے ڈپازٹ کو اب سالانہ رول اوور کی سابقہ شرط سے نکال کر طویل مدت کے لیے بڑھا دیا جائے گا۔

وزیر خزانہ نے یہ اعلان واشنگٹن ڈی سی میں عالمی بینک اور آئی ایم ایف کے اسپرنگ اجلاس 2026 کے موقع پر میڈیا سے گفتگو کرتے ہوئے کیا، جہاں انہوں نے پاکستان کے لیے سعودی مالی معاونت اور حکومت کی بیرونی مالیاتی حکمت عملی سے متعلق اہم تفصیلات شیئر کیں۔

Saudi Arabia Announces USD 3 Billion Additional Support, Extends USD 5 Billion Deposit: Finance Minister

Federal Minister for Finance and Revenue, Senator Muhammad Aurangzeb, has informed that the Kingdom of Saudi Arabia has committed USD 3 billion in additional deposits, with… pic.twitter.com/E8dXPg6g9Y

— Ministry of Finance, Government of Pakistan (@Financegovpk) April 15, 2026

سینیٹر اورنگزیب نے کہا کہ یہ معاونت پاکستان کی بیرونی مالی ضروریات کے لیے ایک نہایت اہم وقت پر فراہم کی جا رہی ہے، جس سے زرمبادلہ کے ذخائر کو مستحکم بنانے اور بیرونی کھاتوں کو مضبوط کرنے میں مدد ملے گی۔ انہوں نے اس عزم کا اعادہ کیا کہ حکومت اپنے ذخائر کو مارکیٹ کی ضروریات اور آئی ایم ایف پروگرام کے تقاضوں کے مطابق برقرار رکھنے کے لیے پرعزم ہے، جس کے تحت مالی سال کے اختتام تک تقریباً 18 ارب ڈالر کے ذخائر، جو کہ تقریباً 3.3 ماہ کی درآمدات کے برابر ہوں گے، حاصل کرنے کا ہدف مقرر ہے۔

وزیر خزانہ نے بتایا کہ پاکستان نے گزشتہ ہفتے کامیابی کے ساتھ 1.4 ارب ڈالر کا یورو بانڈ واپس کیا، جسے انہوں نے “نان ایونٹ” قرار دیا، اور اس بات کا اعادہ کیا کہ حکومت آئندہ تمام بیرونی ادائیگیوں اور واجبات کو بروقت پورا کرنے کے لیے مکمل طور پر پرعزم ہے۔ انہوں نے زور دیا کہ پاکستان کا بیرونی مالیاتی منصوبہ واضح ہے اور اسے ذمہ دارانہ اور منظم انداز میں نافذ کیا جا رہا ہے۔

واشنگٹن میں اپنی مصروفیات کا حوالہ دیتے ہوئے سینیٹر اورنگزیب نے کہا کہ انہوں نے اسٹیٹ بینک آف پاکستان کے گورنر اور امریکہ میں پاکستان کے سفیر کے ہمراہ سعودی وزیر خزانہ محمد بن عبداللہ الجدعان سے تفصیلی ملاقات کی۔ انہوں نے یاد دلایا کہ وہ گزشتہ جمعہ کو اسلام آباد میں بھی سعودی وزیر خزانہ سے ملے تھے، تاہم اس وقت میڈیا رپورٹس اور قیاس آرائیوں کے باوجود حکومت نے باضابطہ تصدیق کے بغیر عوامی سطح پر کوئی بیان دینے سے گریز کیا، کیونکہ ایسے معاملات کو واضح اور مشترکہ مفاہمت کے بعد ہی سامنے لانا ضروری ہوتا ہے۔

وزیر خزانہ نے سعودی عرب کی قیادت خصوصاً ولی عہد شہزادہ محمد بن سلمان، سعودی وزیر خزانہ محمد بن عبداللہ الجدعان اور نائب وزیر خزانہ کا خصوصی شکریہ ادا کیا اور ان کی مسلسل معاونت اور قریبی تعاون کو سراہا۔ انہوں نے اس مالیاتی پیکیج کو عملی شکل دینے میں کی گئی کاوشوں کو بھی سراہا۔

سینیٹر اورنگزیب نے اس معاونت کے حصول اور اس کے نفاذ میں پاکستان کی سیاسی و معاشی قیادت کے کردار کو بھی تسلیم کیا۔ انہوں نے وزیراعظم پاکستان، فیلڈ مارشل، نائب وزیراعظم، گورنر اسٹیٹ بینک، سیکریٹری خزانہ امداد اللہ بوسال اور ان کی ٹیموں کا شکریہ ادا کیا۔

وزیر خزانہ نے کہا کہ موجودہ مرحلے پر اعتماد اور مثبت تاثر انتہائی اہمیت رکھتے ہیں۔ انہوں نے بتایا کہ پاکستان کو بین الاقوامی مالیاتی اداروں، آئی ایم ایف، عالمی بینک، ادارہ جاتی سرمایہ کاروں اور واشنگٹن میں ملاقات کرنے والے دیگر شراکت داروں کی جانب سے غیر معمولی پذیرائی مل رہی ہے۔ انہوں نے کہا کہ عالمی برادری پاکستان کے حالیہ سفارتی کردار کو بھی سراہ رہی ہے، خاص طور پر ان فریقین کے درمیان مکالمے کی راہ ہموار کرنے میں جن کے درمیان دہائیوں سے براہ راست بات چیت نہیں ہوئی تھی۔

انہوں نے کہا کہ عالمی سطح پر اس پذیرائی اور سعودی عرب کی بروقت مالی معاونت نے پاکستان کو آگے بڑھنے کے لیے اہم اعتماد اور رفتار فراہم کی ہے، خصوصاً معیشت اور بیرونی کھاتوں کے حوالے سے، جن میں تجارتی پہلو بھی شامل ہیں۔

سینیٹر اورنگزیب نے مزید کہا کہ پاکستان اپنی وسیع تر بیرونی مالیاتی حکمت عملی پر بھی پیش رفت کر رہا ہے، جس میں حال ہی میں اعلان کردہ گلوبل میڈیم ٹرم نوٹ (GMTN) پروگرام اور متوقع پہلی پانڈا بانڈ اجرا شامل ہیں، تاکہ مالی وسائل کے ذرائع کو متنوع بنایا جا سکے اور عالمی منڈیوں تک رسائی کو بہتر بنایا جا سکے۔

آخر میں وزیر خزانہ نے حکومت کے اس عزم کا اعادہ کیا کہ وہ معاشی استحکام، بیرونی ادائیگیوں کی بروقت تکمیل، اصلاحات کے تسلسل اور دوطرفہ و کثیرالجہتی شراکت داروں کے ساتھ مسلسل روابط کو یقینی بنائے گی۔