اسکول کے دور میں ہی ’ڈیپ فیک‘ کا شکار ہوگئی تھی: جھانوی کپور کے تہلکہ خیز انکشافات

بالی ووڈ اسٹار جھانوی کپور نے اپنی زندگی کے ایک ایسے تلخ تجربے سے پردہ اٹھایا ہے جس نے سوشل میڈیا اور جدید ٹیکنالوجی کے خطرناک پہلوؤں کو بے نقاب کر دیا ہے۔ اداکارہ نے بتایا کہ جب وہ ابھی اسکول میں زیرِ تعلیم تھیں، تب ہی ان کی جعلی اور نازیبا تصاویر انٹرنیٹ پر وائرل کر دی گئی تھیں۔

 ایک انٹرویو کے دوران جھانوی کپور نے انکشاف کیا کہ وہ آئی ٹی کلاس میں بیٹھی تھیں جب انہیں معلوم ہوا کہ ایک فحش ویب سائٹ پر ان کی تصاویر موجود ہیں۔ اداکارہ نے واضح کیا کہ وہ تصاویر 'ڈیپ فیک' (AI) ٹیکنالوجی کے ذریعے تیار کی گئی تھیں اور ان کا حقیقت سے کوئی تعلق نہیں تھا۔ اس واقعے نے انہیں اس وقت شدید ذہنی اذیت اور صدمے سے دوچار کر دیا تھا۔

جھانوی کپور کا کہنا تھا کہ اس وقت ان کی عمر بہت کم تھی اور اس واقعے نے انہیں شہرت کی تاریک حقیقت سے روشناس کرایا۔ انہوں نے سوال اٹھایا کہ کیا مشہور ہونے کا مطلب یہ ہے کہ کوئی بھی آپ کی عزت کے ساتھ کھلواڑ کرے؟ اداکارہ نے تشویش کا اظہار کیا کہ آج کل مصنوعی ذہانت (AI) کے ذریعے کسی بھی شخص کی جعلی ویڈیو بنانا آسان ہو گیا ہے، جس سے نہ صرف ذاتی زندگی بلکہ پیشہ ورانہ کیریئر کو بھی نقصان پہنچنے کا خدشہ ہے۔

انہوں نے مزید کہا کہ ڈیجیٹل دنیا میں اخلاقیات کا جنازہ نکل چکا ہے اور اب وقت آگیا ہے کہ ٹیکنالوجی کے اس غلط استعمال کے خلاف سخت ایکشن لیا جائے۔ جھانوی کے مطابق، یہ صرف ان کا مسئلہ نہیں بلکہ پوری انڈسٹری کی خواتین کے لیے ایک بڑا چیلنج بن چکا ہے، جس کے لیے معاشرے اور قانونی اداروں کو مل کر کام کرنا ہوگا۔